Colossians 1

Kinzi tamâta lâ Kolosi lawea kalonzi tawana Yesu mao nâ

1Naŋa Paulo, naŋa amo Yesu Kirisi ne pâri-tamâta ikura Maro Kindeni tamwata ne pateâŋa mine. Naŋa amo taitu kuku ninda-nambwe Timoti, 2kala aŋgere ŋgua lâ pepa ŋine tini imâ pa miki Maro Kindeni ne ŋgu kamo Kolosi lawea, miki ŋinde kapaipa kuku Yesu Kirisi lâ kala kalomi tawana i mao nâ. Kinda Tamânda Maro Kindeni ne wisi-wisi wa wisi-pisi wa imo kumi.

3Lâ zo ndia maka kakai noŋa pa nenda Maro Yesu Kirisi Tama Maro Kindeni, ande maka uru kaloma ŋgere ŋana miki kâ, aku lâ zo ŋinde rârâni maka kawama ndaŋge ilâ papa i. 4Ŋana tu maka kaloŋo miki parinami tu nemi kalo-tawana ikeno kaika ndo pa Yesu Kirisi, aku miki uru tinimi mwasa ndo panzi Maro Kindeni ne tamâta rârâni. 5Muŋga, lâ zo ŋinde pâri ara ne ŋgua mao ipâŋga wasaseki pami, ande miki kaloŋo ŋgua ŋana vetâŋa arara ŋinde ma muli imâ ipâŋga pami. Maro Kindeni uru ikatona vetâŋa arara ŋinde pami lâ samba lawea. Kala ŋine miki uru kao tinimi nâ ŋana vetâŋa arara ŋinde kâ, aku ŋine igagati ilomi kalomi ŋana kalomi tawana Yesu Kirisi ku kao ilomi ndo ilâ panzi Maro Kindeni ne tamâta. 6Nanayoni, miki kaloŋo pâri ara ŋana Maro Kindeni ne wisi-wisi kâ, kala kasama wisi-wisi ŋinde kilala sondo lâ. Lâ zo muŋgâŋa ŋinde, aku imâ lee ipâŋga lâ zo ŋine, ande pâri ara ŋinde uru ipula kanaŋo ara ndo lâ ilomi kalomi. Aku pâri ara ndainani nâ isala nia ikura tâno pinde kala ipula kanaŋo ipâŋga mine nâ lâ tamâta rârâ ilonzi kalonzi tona. 7Epafras muŋga itula pâri ara ŋinde pami, kala miki kasama lâ. Epafras nde Kirisi ne wurâta tamâta itogo maka mine, aku maka tinima mwasa ndo papa i. I uru ikai maka niama ŋana ivila miki sondo kâ. 8Itapâri pama tu Koroani Sapâŋa igagatimi ŋana kao ilomi ndo ilâ panzi Maro Kindeni ne tamâta.

Paulo ikai noŋa pa Maro Kindeni tu i ma ipu tini kaika panzi kalo-tawana tamâta simo Kolosi lawea

9Mine kala muŋga, lâ zo ŋinde maka kaloŋo miki parinami mine, aku imâ lee ipâŋga lâ zo ŋine, ande ikura zo zo maka kakai noŋa pa Maro Kindeni tu ma isukami ku io Koroani Sapâŋa imâ pami tu ipananami sondo ŋana vetâŋa ndia Maro Kindeni ilo papa ŋinde, ŋana miki ma kakai ilo-kalo ku kasama ŋinde sondo. 10Maka nema noŋa ŋinde nde duvi mine; maka iloma tu miki ma kamo sondo, ikura Maro Ŋalae ipatea pami mine. Ambo miki ma kamo mine, ande i ma ilo ara ŋana nemi vetâŋa rârâni kâ. Maka iloma tu miki ma kaveta vetâŋa arara kie-kie, itogo kâi ipula kanaŋo mine. Aku iloma tu nemi ilo-kalo ma ipâŋga ŋalae, ŋana miki ma kasama Maro Kindeni kilala sondo kâ. 11Maka kano pa Maro Ŋalae tu i tamwata ne walo ara ŋalae tina ŋinde ma ipu tini kaika pa ilomi kalomi, ŋana miki ma kamandi kaika ku kakale malia rârâni tava ndekâŋa nâ. 12Maka iloma tu miki ma kawami ndaŋge pa kinda Tamânda. Ina kala muŋga ivetami kapâŋga tamâta ara, kala miki kakura tu kaleŋge vetâŋa arara rârâni i muŋga ipatea tu ma iveta panzi ne tamâta, kinzi ŋinde i uru ikai maro panzi kala simo lâ i ne sinâla ŋalae ilo. 13Ŋana tu muŋga, kondoma ne walo ikai kinda kaika lâ. Andeta Maro Kindeni itikia kinda piti lâ, aku io kinda tamo kuku ŋgu ŋinde i Natu uru ikai maro papa. Maro Kindeni ilo ndo keno papa i Natu ŋinde. 14Maro Kindeni Natuni ndaina iko kinda piti lâ kondoma ilo, aku izavaru nenda kiesaka rârâni piti marumbu lâ.

Paulo itula Kirisi kilala pwataki

15Kinda takura tu tamora Maro Kindeni nao lâ matânda, ande tia. Taitu i Natu itula Maro Kindeni kilala pwataki pa kinda tamora lâ. I Natu ŋinde ikai maro pa kelekele rârâni ŋinde Maro Kindeni muŋga ipulianzi sipâŋga. 16Nia ndoyo Maro Kindeni ipatea tu i Natu ŋinde ma ipulianzi kelekele rârâni lâ samba ilo wa tâno kulu wa. Ipulianzi kelekele rârâni kinda tamora lâ matânda wa kelekele rârâni takura tu tamora tia wa. Ipulianzi koroani kaika kie-kie ŋinde uru simo sikai poe pa kelekele kie-kie. I tamwata muŋgani ipulianzi kelekele rârâni, aku kelekele rârâni ŋinde simo ŋana sipanea i nâ. 17Nia ndoyo, lâ zo ŋinde kelekele rârâni ŋandai sipâŋga ŋga, ande Kirisi imo muŋgani lâ. Aku kelekele rârâni ŋinde uru simo nianzi nianzi sondo lâ i kalo nâ. 18I tamwata nde imo kulu-kâmba panzi kalo-tawana tamâta ŋgu ŋgu, aku ŋgu ŋinde nde simo sitogo i kie-mbalau mwasina. Kinzi kalo-tawana tamâta ŋgu nenzi via duvi kala i. I tamwata imuŋga panzi tamâta rârâni ŋana imandi lâ mateŋa nianzi imo via kilo. Mine kala i tamwata imo kulu-kâmba pa kelekele rârâni.

19Maro Kindeni ipatea tu i tamwata ne via tava ne ilo-kalo wa kilala ndoni ma ipipi lâ Natu ŋinde ilo. Mine kala Maro Kindeni tamwata imo ndo kuku i. 20Aku Maro Kindeni ipatea tu ma ikai kelekele rârâni lâ samba ilo wa tâno kulu wa, aku ma ikainzi simâ simo taitu kuku i tamwata kilo. Mine kala io Yesu Kirisi ilâ pa kâi popole imâte ku ipaliŋi see maliŋi ndue. Maro Kindeni ne vetâŋa ŋinde iveta kelekele rârâni simo taitu kuku i kilo.

21Muŋga miki kapu mulimi ndo pa Maro Kindeni. Miki nemi ilo-kalo nde ikai kazâŋa papa i. Mine kala kiesaka nde ipipi ndo lâ ilomi kalomi, kala kaveta vetâŋa sakamao kie-kie. 22Andeta Kirisi ŋga imâte lâ kâi popole tini lâ, aku ŋana i ne vetâŋa ara ŋinde kâ, ande Maro Kindeni ivetami kamo ilomi kalomi taitu kuku i marumbu lâ. I ne vetâŋa ŋinde nde duvi mine; i ilo tu igona miki kamâ papa i tava ilomi mbâra-mbâra ndo, nemi soki toŋge tia. Ambo miki ma kamo mine, ande tamâta toŋge ma ikura tu isowe ŋgua lâ tinimi ŋana nemi vetâŋa kâ, ande ma tia. 23Mine nde ara ŋana miki ma kasaŋa nemi kalo-tawana ndindi nâ ku kamandi kaika. Tia ma vetâŋa toŋge imâ itogomi, aku ma kapile nemi mâsi ŋana kao tinimi pa Maro Kindeni tu ma iveta vetâŋa arara pami. Pâri ara nde itula vetâŋa arara ŋinde pwataki pa miki kaloŋo lâ. Naŋa Paulo, naŋani amo wurâta tamâta ŋana pâri ara ŋinde kâ, aku maka tamâta pinde uru katula pâri ara ndainani nâ panzi tamâta rârâni simo tâno kulu.

Paulo uru ivilanzi Kolosi ŋgu

24Kala ŋine naŋa andeka nâ ŋana nâna ŋinde muŋga akai ŋana avila miki kâ. Kinda nde tamâta ŋana takai nâna mine kâ, aku nâna ŋinde ŋandai marumbu ŋga. Kala ŋine naŋa akai nâna lâ warakâŋgu karaeŋgu tini, itogo Kirisi muŋga ikai nâna ŋana ivilanzi kalo-tawana tamâta, kinzi ŋinde simo sitogo i kie-mbalau mine. Aku nâna ma ikeno mine lee, ikura lâ zo ndia nâna mine ma marumbu ndo lâ. 25Maro Kindeni tamwata muŋgani ipatea naŋa tu ma amo i ne ŋgu nenzi wurâta tamâta ŋana avila miki kâ. Aku ipatea wurâta pana tu ma aporo atula i kawa ŋgua ndoni. 26Muŋgani, lâ nia ndoyo, aku imâ lee ipâŋga lâ zo ŋine, ande Maro Kindeni kawa ŋgua ŋinde ikeno paveâŋa nâ, kala tamâta rârâni nde sizizâla ndo ŋana. Aŋga lâ zo ŋine ŋgua ŋinde ipâŋga nia yo panzi Maro Kindeni ne tamâta. 27Maro Kindeni muŋgani ipatea tu ma itula ŋgua paveâŋa ŋinde ipâŋga nia yo pa i ne tamâta kinda. I kawa ŋgua ŋinde nde ara ku ara ndo, aku ŋgua ŋinde nde ŋana ivilanzi tamâta ŋgu rârâni simo tâno ndoni. Ŋgua paveâŋa ŋinde nde mine; Kirisi imo miki ilomi. Mine kala miki uru kao tinimi ŋana zo muli ŋinde miki ma kamo ara ndo kuku i lâ samba lawea.

28Mine nde maka uru katula Kirisi parina panzi tamâta rârâni taitu-taitu. Maka iloma tu tamâta rârâni ma sipaipa ndo kuku Kirisi, aku iloma tu nenzi ilo-kalo ma ipâŋga ŋalae ndo. Mine kala maka uru kaporo ŋgua kaika panzi kapanananzi sondo. 29Naŋa uru amandi kaika ku amakâsa ŋalae tina ŋana aveta wurâta ŋinde kâ. Kirisi walo kaika ilua naŋa ŋana aveta mine, aku i ne walo ŋinde uru ipâŋga nia yo lâ naneŋgu wurâta tini.

Copyright information for XSI